講到韓國，相信大家都會諗到泡菜、炸雞同年糕呢啲食物，但係呢幾年因為疫情大家都冇得去韓國。咁我哋今次喺朗豪坊搵到一間喺韓國大受好評連韓國明星劉在錫都有稱讚嘅韓式炸雞店NeNe Chicken。

呢一間炸雞店喺位於朗豪坊嘅11樓，店內裝修及餐牌主要由黃色設計，令人好容易聯想到炸雞同芝士。而餐廳主要食物當然係炸雞啦，但係都有好多唔同嘅韓國小食，咁我哋今次就食咗玫瑰醬寛粉炒年糕、雙重滋味炸雞同芝士蛋伴烤牛肉炒飯

呢個就係我哋揀嘅雙重滋味炸雞 $188

我哋叫咗韓式甜辣炸雞同招牌炸雞。味道都好因人異議，我哋認為韓式甜辣炸雞嘅味道非常出眾，有韓國辣醬同泡菜嘅味道，有甜酸醬嘅味道，甜酸辣嘅味道比例啱啱好。我哋本來以為炸雞有醬嘅話會好快冧，但係原來咬落去都係脆嘅。招牌炸雞就係原味，可以凸顯出原本嘅味道，一咬落去啲汁就流出嚟。總結來說呢個餸我哋比嘅評分係6/10

呢個係我哋一眾認為最普通嘅食物，芝士蛋伴烤牛肉炒飯 $102

佢嘅餐單係寫住芝士蛋伴，原來佢啲芝士剩係得飯上面嗰啲。完全撈勻左就食唔到有芝士，而且佢嘅牛肉都只係一啲剪到碎嘅牛肉片，只管好少嘅牛肉，全部都只係飯。評分3/10

最後就係呢個玫瑰醬寛粉炒年糕$108

佢嘅重點應該係玫瑰醬，但係其實食唔出玫瑰嘅味道。有濃厚嘅芝士，鮮奶油味。而呢個寬粉只有六七條，認為性價比唔算好。食得出佢嘅西蘭花係有蒜蓉炒過。有炒霖咗嘅洋蔥，都幾甜。佢嘅腸仔有煙熏味，用刀切過好入味。年糕都好冧，不過都係得好少。5/10份量好唔足夠，但係算好食。